相关：
阿占心水欧联奇兵有瑞士美斯领军 巴素利教训坏“仁”
今晚续演欧联16强首回合，小弟嘅重心推介，就系神奇球队巴素利，可以喺主场顶得住拜仁！瑞士班霸巴素利喺分组赛踢走曼联出线，又有“美斯”压阵，实力唔讲得笑；相反德甲嘅拜仁一向蛊蛊惑惑，歇冬后喺联赛仲未赢过盘，作客威力又减半，唔慌系好“仁”，一于捧受让嘅巴素利2.4倍“让球主胜”啦！（有线61及201周四凌晨3:45直播）
呢场波嘅焦点人物，肯定系巴素利个进攻中场梳顿沙基利。呢位身材矮小但非常好波嘅超新星，早就被球评家认定前途无量，来季沙基利将会进身豪门，即系边队？咪就系今晚嘅对手拜仁啰！呢位“瑞士美斯”有以一敌众嘅高超技术，赛前佢亦大派定心丸，话唔会因为对手系未来老细就放水，反而会骚啲“哥利”畀大家睇，拜仁条防线睇怕今晚都几愁！
主场做低过红魔
事实上，巴素利嘅战术系以梳顿沙基利做核心，佢哋嘅主攻踢法非常煞食，阿历山大费尔、法比安费尔同马高史达拿3件杀手，个个都系硬净射术好之辈，佢哋能够喺欧联分组赛作客奥脱福同曼联踢成3:3、喺主场更加以2:1气走“红魔”，一次就话符碌啫，两次唔系符碌喇啩！巴素利嘅实力其实系比大家想像中更强，唔好再睇小佢哋啦！
拜仁内讧小猪打柴
系！对家拜仁慕尼黑踢欧联经验真系好丰富，但正正系佢哋熟晒欧联踢法，明知作客和波都冇问题，只要返主场全力争胜就掂，所以今晚好大机会以稳守为先，未必一定开W。而且“小猪”舒韦恩史迪加有伤唔出得，早前又传出洛宾因为太过独食畀队友排斥，士气唔慌好得去边。即使唔讲军情，斋睇佢哋今季战绩，联赛作客11战5胜、欧联分组赛作客3战亦只系赢得1铺，凭咩让巴素利先？
