相关：
江忠德“黑猫”报仇捣乱兵工厂
阿仙奴睇怕今季又系四大皆空！欧联惨败畀AC米兰后，话佢哋仲有机会晋级真系揾鬼信，士气同信心受创之余，精神支柱亨利又已经松人，今晚几难喺英格兰足总杯作客啃硬骨头新特兰。
阿仙奴喺圣西路球场吞4蛋其实好合理，半场未够都已经扯白旗投降，完全系攻不锐、守不稳。呢班波讲控球率虽然赢晒，但弊在入波有心冇力，最惨系梅迪萨卡加入十字军，令防线牵一发动全身，华美伦打番中坚反而唔惯，连带影响埋沙格拿，仲有复出嘅基兰基比斯不在状态，哥斯尼伤埋就更加唔使旨意寄望佐罗。
阿仙奴之后连场硬仗
面对一条千疮百孔嘅防线，云格惟有以攻代守，佢早前擅用亨利嘅经验，上周末喺英超作客绝杀新特兰，可惜呢位“高贝利之王”借用期满，连呢条桥都用唔到，几难喺惨败之后极速重执信心。
踢杯赛同联赛系两回事，新特兰上周输畀阿仙奴，今晚足总杯随时可以报仇，事关“黑猫”已经喺英超企稳阵脚，可以将全副精神争杯，唔似阿仙奴冇得抖之余，仲要兼顾之后对热刺同红军嘅英超大战，今晚好难再有奇迹出现
