美洲金盃周三早上上演C組最後一輪分組賽，東道主美國對瓜德羅普。美國上輪分組賽輸畀巴拿馬，可能好多人覺得係爆冷，但如果有睇美國兩場分組賽嘅朋友，都唔會覺得意外，因為美國喺今屆賽事演出令人失望，對住巨人殺手瓜德羅普，美國隨時「瓜得」，捧瓜德羅普「讓球客勝」。 （now 634周三早上9時直播）
和都出線無謂搏盡
未講波之前先分析形勢，美洲金盃分組賽係十二隊出八隊，即係話除小組首、次名出線外，三支小組第三名球隊都有兩隊出到線。換句話講，美國今場攞一分已肯定出線，有冇必要贏甚至大炒，大家自己諗諗。
當然，美國上仗恥辱性輸畀巴拿馬後，今仗相信好想贏番場，而且佢哋亦要考慮走線問題，以免八強硬撼大熱墨西哥，不過美國喺首兩場分組賽演出真係毫無說服力可言，畀人感覺係攻不銳守不穩，今仗能否反彈，樂比仔有保留。
瓜德羅普唔易大敗
事實上，美國領隊巴特利自世界盃後已承受極大壓力，從選人到調兵遣將都被國內傳媒批評得體無完膚，而球隊弱點主要係中路防守同埋前線把握力問題，新仔中堅添列姆大賽經驗不足，畀人患得患失感覺，而拍檔葛特臣後上助攻就叻，位置感同領導才能都略嫌不足，攻力不俗嘅瓜德羅普有能力偷到雞！
法國屬地瓜德羅普雖然冇世界排名，但實力一啲都唔弱，陣中有十四名球員喺歐洲搵食，雖然名不經傳，不過踢來有板有眼，頭兩場分組賽都係僅輸一粒，今場對住信心全失嘅美國，有機會締造驚喜！
