本周中喺歐聯賽事作客對完馬賽嘅曼聯，竟然無法拎到作客入球優勢，次回合返到主場都真係幾難打，不過三月中嘅事遲啲先算，曼聯集中精神喺今晚出戰英超聯賽好過啦！
曼聯今場作客對韋根，「紅魔鬼」四日之內飛來飛去，仲要兩場都係作客賽事，相信球員體力一定有影響，今場我就唔多睇好曼聯贏到韋根，話晒韋根依家排喺尾三位置，好想脫離降班漩渦，以呢條根嘅能力，只能夠喺主場發威搶三分。可惜嘅係韋根有心無力，今季主場出擊十四場聯賽，只贏得三場，叫人哋點信你先得o架！今次對住曼聯惟有全力死守，希望主場搶到一分啦﹗
過三關冠軍在望
今場和波就至合理，事關曼聯衰極有個譜，依家喺榜首有五十七分，同第二位嘅阿仙奴只相差一分，絕對再無失分空間，就算點攰都好，都要頂埋呢九十分鐘。另外，曼聯對完韋根之後，跟住個賽程都真係幾蝦人打，連續兩場都要作客，先對車路士，後對利物浦，之後就要踢歐聯主場對馬賽，若然真係咁叻仔過到呢三關，今季聯賽冠軍肯定非「紅魔鬼」莫屬。
