今晚葡超舉行馬德拉島打吡戰，由國民隊主場對馬里迪莫。雖然係同區球隊，但兩軍今季聯賽演出有好大分別，國民隊兩連勝殺入聯賽榜第四位，而馬里迪莫聯賽十戰僅一勝身處下游位置，預期國民隊可延續強勢，讓平半捧上盤。（周六凌晨4時15分開賽）
2連勝重拾佳態
國民隊最近重拾狀態，面對費利拿及塞圖巴爾皆全取三分，排名亦由最低十位以外躍升上至第四。其實國民隊有大幅進步全因教練祖簡奴域有料到，雖然佢喺○七年先至展開執教生涯，但因佢由副練直到坐正都係効力國民隊，故唔單止受球員尊重，亦令國民隊有一股與眾不同嘅凝聚力。或者人腳質素唔係最好，但勝在個個都肯拚肯搏，呢點正係國民隊優勝之處。馬里迪莫今季戰績差劣，作客更加冇把握，全失三分唔出奇。
另外兩場阿甲賽事，颶風隊主場對高隆，平手盤捧主隊。颶風隊近五主場保持不敗，高隆要破其良好賽績唔容易。而班菲特主場對甘拿斯亞，後者聯賽客場落敗率高達八成三，近兩次到訪班菲特亦輸波，賽績上非常不利，班菲特主W穩開。
