皇馬彈甩7分

皇馬彈甩7分

皇馬彈甩7分

唔止連歡樂時光果然過得特別快，其實傷心日子亦一樣可以好快過去！剛於西班牙盃遭到巴塞淘汰的皇家馬德里，傷心都未夠一個禮拜，一眾戰將目前的心情肯定已經由谷底反彈，事關前晚球隊順利贏波，相反巴塞作客維拉利爾只能踢和0:0，換言之皇馬領先已達7分之多！

明顯皇家馬德里就未有受到西班牙盃出局影響，返到主場依舊能夠大炒弱旅薩拉戈薩3:1。雖然皇馬於上半場初段就被薩軍射成0:1，但是卡卡於32分鐘就還以顏色，加上下半場基斯坦奴朗拿度以及奧斯爾亦都幫得到手，最終協助球隊取得主場兩連勝，可惜大熱的讓主「-2」就未能如願開出。其實皇馬近8戰有6仗都有失波，下次捧場客見到多讓「-2」就要小心中伏！
賽後有傳聞指出「狂人」摩連奴極有可能會於夏天離開皇馬，或者會重返英超執教曼城。其實摩帥自空降皇馬之後已經多次傳出同管理層甚至部份球員不和，幾時離開皇馬只屬時間問題！
尾場方面，面對住今季淪落到成為護級份子的維拉利爾，巴塞前線僅擺美斯一人攻堅，而阿歷斯山齊士就爆大冷被列作後備；齋睇此陣容哥帥似乎都有多少輕敵，最終雙方握手言和，令到熱門捧場客又再損手爛腳。值得留意的是，是役巴塞依舊保持到6成以上的控救率，不過全晚僅得2次射門中到龍門，無疑哥迪奧拿要為和波負上一定責任！賽後巴塞有45分，不過落後榜首皇馬已經有多達7分距離，怕且4月舉行的「國家打吡戰」隨時會由冠軍戰「降呢」做例行公事！

愛斯賓奴小勝馬略卡
同晚其餘賽事，愛斯賓奴繼續維持強勢，主場少勝馬略卡1:0；而華歷簡奴以2:3不敵畢爾包。愛斯賓奴同畢爾包雙雙贏波之後繼續守住中上游，令到爭奪來季歐洲賽席位的戰情越演越烈！