漢堡上盤老少「咸」宜
曼城最近喺英超呼風喚雨，但佢哋最近公布嘅賽季財務報表就真係嚇死人，話說曼城2010至2011年賽季虧損去到1.949億英鎊（約23億港元），其中球員人工就佔咗1.74億英鎊。講真，曼城喺佢哋位油王班主入主之後，一直俾人鬧佢破壞球員轉會市場平衡，用超出應有價格去收購球員，炒高晒啲轉會費同人工，照上面條數去睇，呢個批評真係絕對冇錯，如果最後曼城真係攞到英超冠軍，就證明「錢係萬能」呢個說話真係絕對正確，你哋班窮鬼唔恨得咁多啦。
講到錢，今晚德甲重頭戲主角漢堡同賀芬咸應該都冇乜，所以佢哋成績同拜仁咪差咗九條街囉。當然，兩隊點差都好，呢場波都有好個戰果出現，我雷神就睇好漢堡多啲嘞，話晒唔經唔覺佢哋正式比賽已經5場不敗，仲贏過史特加同弗賴堡，今次荷西古里路同馬古斯貝治可以繼續領軍，全取3分應該冇乜難度。（周日34，有線61、64、201及204台周一12:30am直播）
客隊賀芬咸聯賽排名係高過漢堡，慘在呢隊波唔係點識踢作客比賽，聯賽對住科隆、史特加同史浩克04輸晒兼入過1球咁大把，就算伊比斯域、賴恩巴布同羅拔圖法明奴都踢得，仍然都係信唔過，讓球盤開漢堡讓平、半，照捧上盤啦。
雷神今日另一推介決定打穩陣牌，講緊嘅係荷甲維迪斯對飛燕諾比賽。維迪斯依家排喺前列，相信好多人會覺得意外，但一日佢位射手韋菲特邦尼冇傷冇病，相信維迪斯成績都唔會差得去邊。（周日14，香港時間周日7:30pm開賽）
至於飛燕諾聯賽2連敗，仲要場場都冇波入，幾個季初踢得唔錯嘅新仔好似約翰古達迪、謝臣卡比爾呢幾個90後，都冇晒光芒，以呢個狀態作客氣勢如虹嘅維迪斯實死冇生，主勝穩陣。
